Яшчэ адзін год зусім хутка застанецца ў мінулым, таму я як звычайна сеў і ўжо шосты раз запар склаў свой персанальны музычны ТОП. Калі коратка – адносна мінулых гадоў ён стаў крыху цяжэй, больш разнастайным і, як мне падаецца, нават больш цікавым. Для пратаколу адзначу, што спісы складаліся як і раней, дзякуючы лічыльнікам Spotify і last.fm. Паехалі.

У гэтым годзе я паддаўся настальгіі, што добра адлюстроўваюць Placebo і The Unguided на 10 і 9 радках. Вышэй за іх размясцілася Fazerdaze, якая выпусціла альбом “Soft Power” у лістападзе 2024-га, але я пра яго даведаўся толькі ў снежні, таму для папярэдняга ТОПа наслухаць не паспеў. Альбом, дарэчы, шыкоўны настолькі, што я набыў яго на вініле, нават калі яшчэ не меў прайгравальніка. Сёмае месца за Yves. У 2025-ым яна выпусціла толькі адзін міні-альбом, які, на мой погляд, слабейшы за папярэднія, але ўсё яшчэ нічога. Yerin Baek я слухаў у пачатку года, а потым амаль у канцы, калі выйшаў новы альбом (спойлер: ён ёсць у ТОПе ніжэй). Chuu выпусціла прыемны на слых мінік, які я сам таго не заўважаючы слухаў вельмі шмат. Marilyn Manson ніколі не знаходзіўся сярод маіх любімцаў, але сваім апошнім альбомам моцна зачапіў. Ну і п’едэстал: Aska – японскі спявак, актыўны з 80-х. Пазнаёміўся з ім у гэтым годзе і адразу ўлюбіўся ў голас, асабліва ў баладах. SawanoHiroyuki[nZk] – кампазітар, зноў жа з Японіі. Слухаў пераважна адзін альбом, але ён выдаўся такім разнастайным, што я з задавальненнем зацёр яго да дзірак. Урэшце, чэмпіён 2025-га года – Beast in Black – фінскі метал гурт, з якім я выпадкова пазнаёміўся падчас сёлетняга фестывалю Summer Breeze і які стаў галоўным адкрыццём за апошнія 12 месяцаў. Здаецца, што іх фірмовая энергічная помесь меладычнага паўэр-метала і электроншчыны ў стылі 80-х будзе суправаджаць мяне і далей.

А зараз кораценька па альбомах: Thick as Thieves – мой любімы альбом The Temper Trap, гурта, пра які я шмат гадоў нічога не чуў, але нядаўна яны выпусцілі некалькі сінглаў і, спадзяюся, хутка справа дойдзе і да першага за дзесяць гадоў альбома. FEVER DREAM – адзін з найлепшых альбомаў Of Monsters and Men. Яны, дарэчы, сёлета выпусцілі новы, але яго я пакуль не паслухаў. Lichterland – нават не альбом, а зборка лепшых хітоў Unheilig, які я напэўна слухаю кожны год. Beast in Black прадстаўлены альбомамі Berserker, From Hell With Love і Dark Connection. Як ужо казаў вышэй, гурт стаў для мяне адкрыццём, таму я круціў усю дыскаграфію, забяспечыўшы ёй адразу тры месцы. З цікавага ў сярэдзіне – TROLLWALD аднайменнага беларускага гурта. Раптоўна наткнуўся на ягоны першы кліп на YouTube і такім чынам даведаўся пра першы альбом. Раней я гурт чуў і бачыў толькі аднойчы шмат гадоў таму, калі ў краіне яшчэ было культурнае жыццё і хлопцы прыязджалі выступаць у Віцебск, таму зараз вельмі прыемна бачыць, што яны яшчэ актыўныя і выпускаюць якасныя песні. З задавальненнем набыў бы вініл, калі б ён існаваў. Наверсе ТОПа заканамерна аказаліся альбомы выканаўцаў, якія апанавалі папярэдні спіс. Пра іх я ўжо збольшага напісаў, таму паўтарацца не буду і проста перайду на галоўнага.

Напэўна такой разнастайнасці ў маіх выніках яшчэ не было. Тут вам і хэві-метал ад Marko Hietala, і фэнтэзі-мідзівал-рок ад Feuerschwanz, і электра-хардкор ад DeathbyRomy з Wargasm, індзі ад Of Monsters and Men, Fazerdaze і Yerin Baek, сучасны глэм ад StarBenders, фолк ад Trollwald і пост-панк ад Molchat Doma, а таксама поп і рок усіх калібраў ад Yves, Aska, Placebo, SawanoHiroyuki[nZk] ды іншых. Словам, сваім выніковым плэйлістом я больш чым задаволены.

Штогадовы бонус:

Пакуль калякаў пост зразумеў, что назьбіраў матэрыяла на тое, как стварыць ТОП дзесяцігодзя. Але пісаць асобны пост жадання няма, таму прыляплю свою залу славы па выніках 2016-2025 на last.fm сюды. Месцы з 1 па 10.

Выканаўцы: Kim Taeyeon, Yorushika, Dartagnan, LOONA, Aimer, Susumu Hirasawa, Yerin Baek, FTIsland, Red Velvet, Ueda Marie.

Альбомы: My Voice (Kim Taeyeon), Elma (Yorushika), [X X] (LOONA), Heartbreaker (Ueda Marie), Nightmare – Escape the ERA (Dreamcather), Purpose (Kim Taeyeon), Lichterland – Best Of (Unheilig), That’s Why I Gave Up on Music (Yorushika), V (SawanoHiroyuki[nZk]), Penny Rain (Aimer).

Песні: Time Lapse (Kim Taeyeon), Evening calm,Somewhere,Fireworks (Yorushika), Why So Lonely (Wonder Girls), Butterfly (LOONA), Which a Star (Dreamcatcher), Love poem (IU), Next Level (aespa), Where you at (LOONA), Starry Night (Jessica Jung), Mayday (Dreamcatcher).

Як і чакалася, усё апанаваў кейпоп. І хаця за выключэннем асобных артыстаў я ўжо некалькі гадоў яго амаль не слухаю, выціснуць лідараў вельмі няпроста. Што ж, паглядзім як зменіцца сітуацыя яшчэ праз пяток гадоў.